Lunglei 20th July, 2017 :: Food and Drugs Administration, Lunglei leh NEDP tangkawp buatsaihin nimin khan Saikuti Hall ah "Ei leh in zuartute'n an thil zawrh te mihring hriselna tichhe thei thil an zawrhlohna tura sorkar laipuiin, "Food Safety and Standards Act 2006" a siam inhrilhriatna hun neih a ni a, Dist. Bawrhsap leh Lunglei Dist. Food Safety & Standard Committee Chairman nibawk Pi Lalzarmawii'n khuallian niin a hmanpui.
Ei leh In sawngbawldan inhrilhriatna hun hi Pu Lalsandama, Dy. Director and Designated Officer, Food and Drugs Administration Lungleiin a kaihruai a. Khuallian Dist.Bawrhsap Pi Lalzarmawii chuan, Tunlai khawvel thang chho zelah kan ei leh in te alo changkang in, a danglam sawt hle a, kan hma a ei leh in tur chhawpchhuahte hi mihring hriselna atan a him tawk em tih chian hmasak a tul thusawiin, company tam takin Sciene thiamna hmanga ei leh in an siam te pawh; mihring taksa tana thalo tur tam tak a awm thin avangin fimkhur a tul hle ani, a ti. Dawrkai te mai bakah mitinte ei leh in tur lakluhna kawngah an fimkhur a pawimawh thusawiin, Dist.Bawrhsap chuan, Kan chaw bel a rawn thlen hma hian a kalna a thui hle ani tih hria a, sorkar hriatpui chauh - zuar a, ei leh in thei turin mitin in dan leh hrai te ngun taka an zir a pawimawh ani, a ti. Khuallian hian training a tel Lunglei khawpui chhunga Ei leh In zuartute chu mipui hriselna leh thianghlimna kawnga a mawh phurtu an ni tih in hre renga uluk leh fimkhur taka eitur an siamte enkawl thin turin a chah a ni. Khualzahawm Pu Lalsawma, Dy.Food Safety Commissioner leh Jt.Director, FDA pawhin thusawiin, Ram changkang apiangin hriselna an ngaih pawimawh avangin ei leh in thianghlim chauh an duh a, eng thil pawh nise ei leh in tur anih chuan an duh ulukin, sorkar hriatpui ani em tih an fiah hmasa zel a, hei hi sorkar pawhin hria in kum 2006 a Food Safety and Standards Act 2006 a passed hnuah ramchhunga Hotel, Restaurant leh Ei leh in zuartu zawng zawngte chu mihring hriselna tichhe thei thil an siam a, an zawrhchhuahlohna turin Food and Drugs Control Act 2016 hnuaiah khauh takin hma ala ta a ni, a ti. Mizoram chhunga Hotel leh Restaurant thenkhatte chu mihring hriselna tichhe thei tur khawpin an che trawp nia sawiin Pu Lalsawma chuan, heng mite control tur hian theihtawpchhuaha hmalak chhoh mek anih thu a sawi a, ei leh in zuartute reng rengin Registration leh Lincense an neih ngei a tul thu leh Lincense neilo te chu an dawr khar sak theih an nih bakah mihring hriselna atana himlo an hralh chhuak anih chuan thla 6 Lung In tan leh cheng nuai 5 thleng chawia hrem theih an nih thu a sawi. Nimina training-ah hian Lunglei khawpui chhunga ei leh in (nepnawi) zuartute an tel tha hle a, Directorate of Health Services a, Food and Drugs Administration atangin Pu F. Lalliantluanga DO leh Pi Lalrinkimi Pachuau FSO ten Ei leh in zuartute tana hriattur leh zawm tur hrang hrangte a lem nen entir in an sawifiah. Dawr neitute tana Registration leh Lincense tih dan te bakah, dan bawhchhiate chunga hremna pek theih dan hrang hrangte chipchiar takin an hrilh a ni. Tun dinhmunah Mizoram chhunga ei leh in tur zawrhchhuahte reng reng mihring hriselna atana pawi thei a awmlohna turin State Food Safety Commissioner hnuaiah hmalak chhoh mek a ni a, ei leh in tur rinhlelh awmte chu Public Health Laboratory, Guwahati leh Deptt. of Pharmacy, RIPANS, Aizawl ah te enfiah thin niin, deptt. hotute chuan Antam leh thlai hnah hrang hrangte pawh enfiah theih reng anih thu an sawi.
